Սատանայական երրորդությունը, որի մասին խոսվում է Հայտն.16:13 համարում, այդ ժամանակ ազդեցություն է գործում ողջ երկրի վրա: Սատանան դեռևս այս աշխարհի իշխանն է, և այս նախավերջին ջղաձգական փորձով ձգտելու է բերել ամենասարսափելի աղետները՝ բոլոր հավաքված ռազմական ուժերին Իսրայելի դեմ մղելով (Զաք.14:2): Սատանան՝ վիշապը, իշխանություն ունի թե՛ քաղաքական, թե՛ կրոնական ոլորտում: Նա տիրում է իր տրամադրության տակ եղող ողջ մարդկության վրա: Այդ սատանայական երրորդությունից՝ Վիշապ-սատանա, գազան-քաղաքական տիրակալ, սուտ մարգարե- կրոնական ղեկավար, դուրս են գալիս երեք պիղծ հոգիներ, որոնք հրաշքներ են կատարում (դրանք կեղծ և մոլորեցնող հրաշքներ են) և գնում են բովանդակ աշխարհի թագավորների մոտ: Այդ ժամանակ պետությունների բոլոր ղեկավարները, ինչպես նաև բոլոր պատասխանատու պաշտոնները զբաղեցնողները ուղղակիորեն ենթարկվում են սատանայի ազդեցությանը: Ոչ մի բացառություն չի լինի: Անկախ նրանից, թե տարբեր երկրներում բնակչությունը ինչպես է տրամադրված Իսրայելի հանդեպ, կառավարությունները ստիպված են լինելու միահամուռ գործել, որովհետև ենթակա են ՄԱԿ-ին: 16-րդ գլխի 17-21 համարներում գտնում ենք, որ ի թիվս այլոց, խոսվում է նաև Բաբելոն մեծ քաղաքի դատաստանի մասին: Այստեղ խոսքը Եփրատ գետի վրա եղած Բաբել քաղաքի մասին չէ, որը վերանվանվեց Բաբելոն լեզուները խառնվելուց հետո, որովհետև այդ բառը թարգմանվում է «խառնաշփոթություն». այդ քաղաքը արդեն գոյություն էլ չունի, իսկ այստեղ խոսվում է խորհրդանշական Բաբելոն քաղաքի մասին: Այդ քաղաքը շատ է նկարագրված Հայտնության տարբեր գլուխներում: «Յոթերորդ հրեշտակն իր գավաթն օդի վրա թափեց, և երկնքի տաճարից ու աթոռից մեծ ձայն դուրս եկավ, որ ասում էր. «Եղա՛վ»: Եվ ձայներ, փայլատակումներ և որոտմունք եղան, ու մեծ երկրաշարժ եղավ, որպիսին չէր եղել, քանի մարդիկ երկրի վրա են. այնպիսի մեծ երկրաշարժ էր: Եվ մեծ քաղաքը երեք կտոր եղավ, և ազգերի քաղաքները վայր ընկան, և մեծ Բաբելոնը հիշվեց Աստծո առաջ, որ իր ցասման թունդ գինու բաժակը նրան տա: Եվ ամեն կղզի փախավ, և սարերը չգտնվեցին: Եվ երկնքից մարդկանց վրա մեծ-մեծ, տաղանդաչափ կարկուտ էր իջնում: Եվ մարդիկ հայհոյեցին Աստծուն այն կարկտի հարվածի համար, որովհետև նրա պատուհասը սաստիկ մեծ էր» (Հայտն.16:17-21): Ինչպես երևում է ընդհանուր նկարագրությունից, այն ժամանակ միայն ռազմական մարտավարություն չի լինելու: Ողջ երկիրը, ծովն ու ցամաքը կընդգրկվեն այդ պատուհասներում: Կղզիներն ու սարերը կսասանվեն այնպիսի մեծ երկրաշարժից, որի նմանը դեռ երկրի վրա եղել, աշխարհի քաղաքները կավերվեն, և մեծ Բաբելոնը մոխրի կվերածվի: Ամեն կողմից և բոլոր ոլորտներում կկատարվի դատաստանի և մաքրման գործընթացը: Անշուշտ, ոչ ոքի խորհուրդ չենք տա այդ ժամանակ երկրի վրա լինել: Ընդհակառակը, թող բոլոր Աստծո Խոսքին հավատացողները աղոթեն, որ արժանի լինեն փրկվելու այդ բոլոր բաներից և Մարդու Որդու առջև կանգնելու. «Ուրեմն արթուն կացեք և ամեն ժամանակ աղոթեցեք, որ արժանի լինեք այն բոլոր բաներից փրկվելու, որ տեղի են ունենալու, և կանգնելու Մարդու Որդու առաջ» (Ղուկաս 21:36):