Վեցերորդ գլուխը խորհրդանշական ձևով նկարագրում է առաջին վեց կնիքների բացումն ու դրանց բովանդակությունը: Կնիքների բացման վերաբերյալ թեման արդեն շատ է քննարկվել, դրա համար միայն թեթևակի կշոշափենք այն, ինչպես այդ արեցինք Եկեղեցուն ուղղված յոթ նամակների քննարկման ժամանակ: Առաջին չորս կնիքների ժամանակ ձիու վրա նստած մի ձիավոր է ցույց տրվում մեզ, բայց ամեն անգամ ձին տարբեր գույնի է: Այս համատեքստում ուշագրավ է այն, որ չորս կենդանիները, որոնք Աստծո կողմից են, կանգնած են գահի առջև, մինչ չորս ձիավորները գործում են հակառակորդի համար: Վաղուց ի վեր ձին խորհրդանշում է պատերազմական գործողություններ: Այստեղ նկարագրվում է Քրիստոսի հակառակորդը, որը երկրի վրա Քրիստոսի հաղթական շքերթի կողքին վարում է իր կրոնական արշավները: Զաքարիայի մարգարեության մեջ նկարագրվում են չորս ձիեր, որոնք հետո լծվեցին չորս կառքերին: Դրանք ունեն նույն գույները, ինչ որ չորս կնիքների չորս ձիերը (Զաք. 1 և 6): Զաքարիայի մարգարեության մեջ խոսքը Իսրայելի հալածվելու և ցրվելու մասին է, իսկ Հայտնության գրքում խոսքը Եկեղեցու հալածանքի և ոչնչացման մասին է: Նույն դիվական զորությունները, որոնք օգտագործեցին հռոմեական կայսրությանը Իսրայելի ժողովրդին ճնշելու համար, նաև հալածում են Եկեղեցուն սկզբից ի վեր: Քրիստոսին նմանակողը հեծնում է չորս տարբեր ձիերի, որոնց գույները ցույց են տալիս ամեն ժամանակաշրջանում տեղի ունեցած զարգացումները: Հովել մարգարեի գրքում հակաքրիստոսի այդ ավերիչ զորությունը իր չորս փուլերում նկարագրվում է որպես խառնիճ, մորեխ, ջորյակ, երևիլ(Հովել 1:4, 2:25): Նորկտակարանյան Եկեղեցին Հիսուս Քրիստոսի Մարմինն է Նրա ողջ լեցունությամբ: Նա Կյանքի Ծառն է, որը պտուղ է բերում, իսկ մենք Նրա մեջ ենք: Նա Որթն է, իսկ մենք ճյուղերն ենք: Հակառակորդը փորձել է ոչնչացնել այդ աստվածային պտղատու ծառը չորս փուլերի ընթացքում, չորս ձիավորների միջոցով, բայց Աստված խոստացել է Հովել մարգարեի միջոցով վերադարձնել այն, ինչ ոչնչացվել էր (Հովել 2:25): Առաջին երեք կնիքներն արդեն մտել են պատմության մեջ, բայց չորրորդ կնիքը տևում է մինչև Նոր Կտակարանի Եկեղեցու վերջը: Հինգերորդ կնիքը վերաբերում է հրեաներին: Վեցերորդ կնիքը տևում է մինչև դատաստանների ժամանակի վերջը: Յոթերորդ կնիքը ընդգրկում է յոթ փողերի դատաստանները, որոնք ասպարեզ են գալիս վեցերորդ կնիքի ժամանակաշրջանում: