Այժմ եկեք քննարկենք գազանի դրոշմը. «Եվ նա ստիպում էր բոլորին՝ փոքրերին ու մեծամեծներին, հարուստներին ու աղքատներին, ազատներին ու ծառաներին, որ դրոշմ դնի նրանց աջ ձեռքին կամ ճակատին»: (Հայտն. 13:16): Կասկած չկա, որ խոսքը տեսանելի նշանի մասին չէ, որը տարբեր ժամանակաշրջաններում հրեաները ստիպված են եղել կրել: Աստծո կնիքը, որով Նա կնքում է Իրեն պատկանողներին, նույնպես տեսանելի չէ: Իսրայելի ցեղերից եղող 144000 հոգին նույնպես իրենց ճակատներին կրելու են Աստծո կնիքը, որը տեսանելի չի լինելու: Աստծո կնիքը նաև չի նշանակում որոշակի օր պահել կամ տոնել, ինչպես սովորեցնում են շատերը: Որպես ուխտի նշան, ոչ թե որպես Կնիք, Աստված Իսրայելին պատվիրեց պահել շաբաթը (Ելից 31:12-17): Նրանք, ովքեր պատկանում են Եկեղեցուն, արդարացված են Քրիստոսի հանդեպ հավատքով, Աբրահամի նման ստանում են Աստծո կնիքը (Հռոմ.4:11, 2 Կորնթ.1:22): Նրանք Հոգով կնքված են իրենց մարմինների փրկության օրվա համար, ոչ թե շաբաթվա որևէ օրվա (Եփես.4:30): Մեծ նեղության ժամանակ մարդիկ ստիպված կլինեն ընդունել կրոնական համակարգը և ենթարկվել դրա իշխանությանը, այլապես չեն կարողանա ո՛չ գնել, ո՛չ վաճառել: «Ճակատը» ցույց է տալիս որոշումը, որն ընդունվում է գլխում, այսինքն՝ բանականության մեջ: «Ձեռքը» ցույց է տալիս գործերը, գործողությունները, որոնք հետևում են ընդունված որոշմանը: Որևէ համակարգի մեջ մտնելը, անդամակցությունը վավերացվում է սեփական ձեռքով արված ստորագրությամբ: Այն ժամանակ աստվածաշնչյան հավատացյալները վնասներ կկրեն և կհալածվեն կրոնական մարդկանց կողմից: Օրինակ, երբ աշխատանք փնտրելիս անհրաժեշտ լինի նշել կրոնը, անմիջապես կորոշվի, թե տվյալ անձը աշխատանք ստանալու է, թե ոչ: Գազանի դրոշմը հոգևոր բնույթ ունի և կապ ունի «վարդապետության» հետ: Մի կողմից Աստծո ճշմարիտ վարդապետությունը Իրեն պատկանողները ընդունում են, կրում և գործադրում, մյուս կողմից համակարգին պատկանողները հետևում են հակառակորդի սուտ վարդապետությանը: Վարդապետությունը, հավատքը, համոզմունքը տեսանելիորեն չեն դրվում ճակատին և ձեռքին, կամ հանվում, այլ կրում են սրտում և գործնականում կիրառում: Հոգով կնքումը տեղի է ունենում Ճշմարտության Խոսքն ընդունելուց հետո (Եփես.1:13), իսկ գազանի դրոշմը դրվում է ստության խոսքը ընդունելուց հետո: Հետևյալ հատվածը վերջնական պարզաբանում է տալիս այս թեմայի վերաբերյալ, այսինքն՝ խոսքը որևէ արտաքին նշանի մասին չէ, այլ բացահայտում է այն փաստը, որ այդ դրոշմն իր մեջ պարունակում է գազանի անունը և անվան համարը. «Որպեսզի ոչ ոք չկարողանա գնել կամ վաճառել, բացի նրանից ով ազանի դրոշմը կամ նրա անունը կամ նրա անվան համարն ունի: Իմաստությունն այստեղ է, ով որ միտք ունի, թող հաշվի ազանի թիվը, որ մարդու թիվ է, և նրա թիվը վեց հարյուր վաթսունվեց է» (Հայտն.13:18): Սա լիակատար բացահայտումն է առեղծվածային դրոշմի, որում գտնվում է եռակի համակցությունը, որի ելակետը ամեն անգամ գազանն է: Դրանում ամփոփվում է 666 թիվը, որը համապատասխանում է մի մարդու տիտղոսին: