Հաշվի առնելով, որ կան բազում սուտ մարգարեներ և սուտ քրիստոսներ, որոնց մասին Հիսուսը հայտնել էր, կարևոր է ճանաչել բոլոր ճշմարիտ մարգարեների հատկությունները աստվածաշնչյան տեսանկյունից: Ստորև ներկայացնում ենք դրանցից մի քանիսը. Նրանք ուղղակիորեն Աստծո կողմից են կանչված: Նրանք իրենց հանձնարարությունը անմիջապես Աստծուց են ստացել: Նրանք ուղղակիորեն են ուղարկվել: Նրանք Խոսքը ուղղակիորեն են ստացել: Նրանք ներկայացել են միայն Աստծո պատվերով: Նրանք «տեսանողներ» էին, տեսիլքներ էին տեսնում: Նրանք ասում էին միայն այն, ինչ Աստված է ասել: Նրանք անում էին միայն այն, ինչ Աստված է պատվիրել: Նրանք միշտ մերժվել են, հալածվել և այլն: Նրանք ճանաչում էին միայն միակ Աստծուն, ում ծառայության տակ գտնվում էին: Բոլոր այս հատկությունները չկան սուտ մարգարեների մոտ: Նրանք ուղղակի կոչում և աստվածային լիազորություն չեն ստացել: Նրանք Աստծո կողմից չեն ուղարկվել և չեն քարոզում բնօրինակ Խոսքը, այլ իրենց մեկնությունները, հետևում են իրենց սեփական ծրագրերին,առանց ընդգրկվելու Աստծո ծրագրի մեջ: Միայն հրաշքներն ու նշանները չեն վավերականացվում Աստծո կողմից: Հետևյալ սուրբգրային հատվածները հստակ ցույց են տալիս դա: «Եթե միջիցդ մեկ մարգարե կամ երազատես դուրս գա և քեզ նշան կամ հրաշք տա, և կատարվի քեզ ասած նշանը կամ հրաշքը, և քեզ ասի թե գնանք օտար աստվածներ պաշտենք, որոնք դու չես ճանաչում, այն մարգարեի կամ երազատեսի խոսքին մի լսիր, որովհետև Եհովա Աստվածը ձեզ փորձում է, որ հասկանաք թե արդյոք դուք ձեր Եհովա Աստծուն ձեր բոլոր սրտով և բոլոր հոգով սիրում եք: Ձեր Եհովա Աստծուն հետևեք և Նրանից վախենաք, Նրա պատվիրանները պահեք և Նրա ձայնին լսեք, Նրան պաշտեք և Նրան հարեք: Եվ այն մարգարեն կամ երազատեսը պիտի մեռնի, որովհետև ապստամբություն խոսեց ձեր Եհովա Աստծո դեմ, որ ձեզ Եգիպտոսի երկրից հանեց և ձեզ ծառայության տանից ազատեց, որ ձեզ խոտորեցնի այն ճանապարհից, որ ձեր Եհովա Աստվածը ձեզ պատվիրեց, որ նրա մեջ գնաք և չարությունը ձեր միջից վերացնեք» (2 Օրին.13:1-5): Միքիա մարգարեի օրերում Սեդեկիա «մարգարեն» իրեն երկաթե եղջյուրներ պատրաստեց և աղաղակեց. «Այսպես է ասում Տերը. սրանցով կհրես ասորիներին մինչև որ նրանց բնաջինջ անես: Եվ բոլոր մարգարեները այնպես էին մարգարեանում ասելով. «Գնա Ռամովթ-Գաղաադ և կհաջողես, և Տերը կտա թագավորի ձեռքը» (2 Մնաց. 18:10,11): Մինչդեռ դա էր «Այսպես է ասում Սեդեկիան», ոչ թե՝ «ԱՅՍՊԵՍ Է ԱՍՈւՄ ՏԵՐԸ»: Սեդեկիան չորս հարյուր մարգարեների հետ խաբվել էր սուտ ոգուց և ընկել էր մոլորության մեջ: Ողջ Հին Կտակարանում միշտ եղել է միայն մեկ ճշմարիտ մարգարե և բազում սուտ մարգարեներ, որոնք եղել են սխալ ներշնչման տակ: Այդ մասին հատկապես կարելի է կարդալ Երեմիա մարգարեի գրքի 23-րդ գլխում և Եզեկիելի 13-րդ գլխում: Ճշմարիտ մարգարեի՝ Երեմիայի միջոցով Տերը դիմում էր սուտ մարգարեներին և հանդիմանում նրանց. « Բահաղով մարգարեացան և մոլորեցրին իմ Իսրայել ժողովրդին »: «Այսպես է ասում զորաց Տերը. մի՛ լսեք ձեզ համար մարգարեացող մարգարեների խոսքերին, նրանք ձեզ խաբում են, նրանք իրենց սրտի տեսիլքն են խոսում, և ոչ թե Տիրոջ բերանից… Ես այդ մարգարեներին չեմ ուղարկել, բայց իրենք վազ են տալիս, և ես նրանց հետ չեմ խոսել, բայց իրենք մարգարեանում են: Եվ եթե կանգնած լինեին իմ խորհրդում, այն ժամանակ լսել կտային իմ խոսքերը իմ ժողովրդին, և նրանց հետ կդարձնեին իրենց չար ճանապարհներից և իրենց չար գործերից »: «Մինչև ե՞րբ է լինելու այս սուտ մարգարեացող մարգարեների սրտում, որ մարգարեանում են իրենց սրտի խաբեությունը, որոնք մտածում են, որ Իմ ժողովրդին մոռացնել տան Իմ անունը այն երազներով, որ իրար պատմում են, ինչպես որ իրենց հայրերը մոռացան իմ անունը Բահաղի պատճառով» (Երեմ.23:13-32): «Եվ Տիրոջ Խոսքը եղավ ինձ՝ ասելով. «Մարդու որդի, մարգարեացիր Իսրայելի մարգարեացող մարգարեների դեմ և ասա իրենց սրտից մարգարեացողներին. լսեցեք Տիրոջ Խոսքը. այսպես է ասում Տեր Եհովան. վա՜յ հիմար մարգարեներին, որ իրենց հոգու հետևից են գնում և ոչինչ չեն տեսել »: «Նրանք դատարկ տեսիլք ու սուտ գուշակություն են տեսնում, որ ասում են. «Տերն է ասում», թեև Տերը նրանց չի ուղարկել և հույս են տալիս, թե խոսքը պիտի կատարվի: Չէ՞ որ դատարկ տեսիլքներ տեսաք, և սուտ գուշակություն խոսեցիք և ասացիք՝ Տերն է ասել, թեև ես չէի խոսել»: «Սրա համար ես ձեզ դեմ եմ,ասում է Տեր Եհովան: Եվ իմ ձեռքը պիտի լինի այն մարգարեների դեմ, որոնք դատարկ տեսիլք են տեսնում և սուտ գուշակում. նրանք պիտի չլինեն իմ ժողովրդի խորհրդում նրա համար և հենց նրա համար, որ մոլորեցնում են իմ ժողովուրդը ասելով, թե՝ խաղաղություն է, քանի որ խաղաղություն չկա » (Եզեկ.13:1-10): Նա, ով ուշադիր է նայում այստեղ ներկայացված «ԱՅՍՊԵՍ Է ԱՍՈւՄ ՏԵՐԸ» խոսքին սուտ մարգարեների վիճակի և նրանց ծառայության վերաբերյալ, կտեսնի, որ նույն մոլորությունները, նույն խաբեությունները այսօր էլ կան: Գուշակություններով խառնված սուտ բաներ են մարգարեանում լավ մտադրություններով, սուտ տեսիլքներ են տեսնում: Ժողովրդի առջև փրկության մասին են խոսում, երբ իրականում չունեն Քրիստոսով աստվածային փրկությունը: Շատերը ենթարկվում են իրենց սեփական հոգուն, ուզում են Աստծուն օգնել և մարգարեանում են իրենց սրտի խորհուրդները, այնպես, որ մարդիկ մոլորության մեջ են ընկնում իրենց «ԱՅՍՊԵՍ Է ԱՍՈւՄ ՏԵՐԸ» խոսքով և հաստատվում են իրենց կեղծ քրիստոնեության մեջ: Այնուհետև Աստված հակառակ է կանգնում նաև եկեղեցիների և համայնքների մարգարեուհիներին, որոնք նույնպես մարգարեանում են իրենց երևակայության համաձայն: Բարի մտադրություններով ասում են. «Տերը ինձ մի խոսք է տվել քեզ համար», «Նա ինձ մի բան է ցույց տվել»: Բայց Աստված նրանց հանդիմանում է՝ ասելով. «Վայ այն կանանց…», որովհետև նրանք բարձիկներ են կարում և ամեն դեպքի համար համապատասխան չափ են գտնում՝ հոգիներ որսալու նպատակով: Հետո Տերը դատում է եկեղեցիների և համայնքների մարգարեուհիներին, որոնց «կին» է անվանում, ինչպես «Հեզաբել կնոջը», որն իրեն մարգարեուհու տեղ էր դրել, և ասում է. «Ուրեմն դատարկ տեսիլք մի տեսնեք և այլևս գուշակություն մի գուշակեք, և ես պիտի ազատեմ իմ ժողովրդին ձեր ձեռքից և կգիտենաք, որ ես եմ Տերը» (հ. 23): Ոչ մի ուրիշ պարգևի միջոցով իրենց չեն ենթարկում քարոզիչներին և եկեղեցիներին, ոչ մի ուրիշ պարգևի միջոցով չեն կարող բարձրացնել, ցած նետել, նենգափոխել այնպես, ինչպես մարգարեության սուտ պարգևի միջոցով: Հոգու ճշմարիտ ծառայությունները և պարգևները միշտ ծառայում են Եկեղեցու շինությանը, և երբեք Եկեղեցուն չեն տանում մոլորության ՝ այն քանդելու համար: Բոլորը չեն ուզում ուղղվել, բայց Տերը կկանչի Իր ժողովրդին, կզատի նրան, կմաքրի և կսրբի այնպես, որ ոչ մի սուտ մարգարե, ոչ մի սուտ մարգարեուհի իշխանություն չեն ունենա նրանց վրա: Նա, ով լսում է սուտ մարգարեությունները, չի կարող լսել մարգարեական ճշմարիտ Խոսքը: Նույն կերպ, բոլոր նրանք, ովքեր ընդունում և հավատում են ճշմարիտ Խոսքին և Սուրբ Գրքի ողջ մարգարեությանը, չեն ընկնի սուտ մարգարեությունների բերած բարեպաշտական մոլորությունների մեջ: Ուզում ենք ևս մեկ անգամ ընդգծել ճշմարիտ մարգարեի հատկանիշները: Ամեն ճշմարիտ մարգարե և Աստծո ծառա իր սեփական ականջներով ուղղակի կոչում է ստացել Աստծուց: Ամեն ճշմարիտ մարգարե Խոսքը ստացել է ուղղակիորեն Աստծուց և այդպիսով Աստծո ձայնն է դառնում ժողովրդի համար: Աստծո Խոսքը գալիս է նրանց մոտ, ում Տերն է լիազորել: Տիրոջ ճշմարիտ մարգարեներն ու առաքյալները սպասավորներ են համարվում, որովհետև Նրա անմիջական ծառայության տակ են, նրանք ուղարկված են Նրա կողմից և անձամբ ճանաչում են Տեր Աստծուն: Միքիան՝ ճշմարիտ մարգարեն ասում էր. «Կենդանի է Տերը, որ իմ Աստվածն ինձ ինչ որ ասի, այն եմ խոսելու և նա ասաց. «Ուրեմն լսեցեք Տիրոջ Խոսքը. ես տեսա Տիրոջը նստած իր աթոռի վրա, և երկնքի բոլոր զորքերը կանգնած նրա աջ և նրա ձախ կողմին և արդ Տերը սուտ ոգի է դրել քո այդ մարգարեների բերանում, բայց Տերը քեզ համար չարիք է խոսել» (2 Մնաց. 18:13, 18, 22): Միքիան Աստծո մարգարեն էր, չորս հարյուր հոգին իրենք իրենց մարգարե էին հռչակել և խաբվեցին սուտ ոգու կողմից: Ուշադրություն դարձնենք տարբերությանը: Հովսափատն ասաց. «Ինձ լսեցեք, Հուդա և Երուսաղեմի բնակիչներ. հավատացեք ձեր Տեր Աստծուն և հաստատ կմնաք, հավատացեք Նրա մարգարեներին, և հաջողություն կունենաք»: (2 Մնաց.20:20): «Հավատացեք Նրա մարգարեներին», որովհետև մարգարեներն ունեն Նրա բացահայտված Խոսքը և բացահայտված կամքը: