Հին Կտակարանի վերջին մարգարեի միջոցով Աստված տվեց խոստում, որը պիտի իրականանար Նոր Կտակարանի սկզբում (Մաղաքիա 3:1): Դա Հին Կտակարանի առաջին խոստումն էր, որն իրականացավ Նոր Կտակարանի ժառանգորդների վերաբերյալ: Դրա իրականացումն այն էր, որ Տերն Իր առջևից պատգամաբեր ուղարկեց, որ պատրաստի Իր ճանապարհը: Վկայակոչելով Հովհաննես Մկրտչին՝ մեր Տերն ասել է. ՙՈրովհետև սա նա է, որի համար գրված է. ՙԱհա Ես իմ հրեշտակին ուղարկում եմ Քո առջևից, որ Քո առաջ Քո ճանապարհը պատրաստի՚ (Մատթ.11:10): Ղուկասն ամփոփել է, թե որն է Հովհաննես Մկրտչի ծառայության նպատակը. ՙԵվ Իսրայելի որդիներից շատերին իրենց Տեր Աստծո կողմը կդարձնի: Ինքն էլ Եղիայի հոգով ու զորությամբ նրա առաջից կգա, որպեսզի հայրերի սրտերը որդիներին դարձնի, անհնազանդներին` արդարների իմաստության, որպեսզի Տիրոջ համար պատրաստ ժողովուրդ կազմի՚ (Ղուկաս 1:16, 17, Մատթ. 17:12-13): Բոլոր նրանք, ովքեր Աստծո առաջ շնորհք էին գտել Քրիստոսի առաջին գալստյան ժամանակ, գնացին Հորդանան, ընդունեցին աստվածային պատգամը և մկրտվեցին: Բոլոր նրանք, ովքեր հավատացին Հովհաննես Մկրտչի ասածին՝ ՙԵս ձեզ ապաշխարության համար ջրով եմ մկրտում, բայց իմ հետևից եկողն ինձանից զորավոր է, ես նրա կոշիկներն էլ վերցնելու արժանի չեմ, Նա ձեզ կմկրտի Սուրբ Հոգով ու կրակով՚ (Մատթ.3:11), անկասկած հավաքվեցին Երուսաղեմում, որովհետև այնտեղ իրականացավ Սուրբ Հոգով մկրտության խոստումը: 120 հոգին առաջինն ապրեցին խոստումի իրականացումը, երբ հավաքված էին վերնատանը, ինչպես այդ մասին հայտնել էր հարուցյալ Տերն Իր համբարձումից առաջ Գործք 1:4-5 համարներում. ՙԵվ միասին հավաքված ժամանակ նրանց պատվիրեց Երուսաղեմից չհեռանալ, այլ սպասել Հոր խոստմանը, որին մասին ասաց Նա՝ ՙԻնձնից լսեցիք, թե հիրավի, Հովհաննեսը ջրով մկրտեց, բայց դուք, սրանից շատ օրեր չանցած, Սուրբ Հոգով պիտի մկրտվեք՚: Պետրոսը հավաքված բազմությանը հայտնեց, թե ինչ է կատարվել, և խոսելով Փրկչի մասին՝ ասաց. ՙԱրդ Աստծո աջով բարձրացած և Սուրբ Հոգու խոստումը Հորից ստացած՝ հեղեց այն, որ դուք հիմա տեսնում ու լսում եք՚ (Գործք 2:33): Այդ օրը սկզբնական Եկեղեցուն ավելացվեց երեք հազար հոգի (Գործք 2:37-41): Պետրոսը նույնպես Նոր Կտակարանի Եկեղեցու ստեղծման օրը վկայակոչեց Հին Կտակարանի այս խոստումը, որը գրված է Հովել 2:28 համարում. ՙԱյլ սա Հովել մարգարեի միջոցով ասվածն է. ՙԵվ պիտի լինի, որ վերջին օրերում, -ասում է Աստված, - Իմ Հոգուց ամեն մարմնի վրա պիտի թափեմ...՚ (Գործք 2:16): Մենք դեռ ապրում ենք վերջին օրերում, դրա համար կարող ենք վկայակոչել Սուրբ Հոգու մկրտության այդ նույն խոստումը: Բոլոր նրանց համար, ովքեր հավատում են Լրիվ Ավետարանի պատգամին, ապաշխարում են և մկրտվում Տեր Հիսուս Քրիստոսի Անունով, ուժի մեջ է այս խոստումը՝ ՙ... Սուրբ Հոգու պարգևը կստանաք՚ (Գործք 2:38): Ինչպես սկզբում, այսօր նույնպես ճշմարիտ հավատացյալներն ապրում են այն, ինչ Աստված խոստացել է՝ Քրիստոսին դառնալ, մեղքերի թողություն, նորոգություն, Սուրբ Հոգու մկրտություն, Սուրբ Հոգով կնքում: Սկզբնական քրիստոնեության մեջ մեր եղբայրներն ու քույրերը շնորհքով ճաշակել են լիակատար փրկությունը: Առաքյալը գրում է, թե ինչ են ստացել նրանք, ովքեր ընդունել են Խոսքը այն ժամանակ. ՙՆրանով դուք էլ հուսացիք, երբ ճշմարտության Խոսքը լսեցիք՝ ձեր փրկության Ավետարանը, որին էլ երբ հավատացիք, խոստացված Սուրբ Հոգով կնքվեցիք: Որը մեր ժառանգության գրավն է, մինչև ստացվածքի փրկությունը՝ նրա փառքի գովության համար՚ (Եփես.1:13,14): Այնուհետև գալիս է նախազգուշացումը. ՙԵվ մի տրտմեցրեք Աստծո Սուրբ Հոգուն, որով կնքվեցիք փրկության օրվա համար՚ (Եփես. 4:30):