Լսե՜ք, բոլոր ազգերին և ցեղերին պատկանող հավատացյալնե՜ր. Փեսան, որը Խոսքն է, Իր հետ կտանի միայն Հարս-Խոսքին: Երկնքում կլինի միայն Գառնուկի Արյունով լվացված, Ճշմարտության Խոսքով սրբացած և Հոգով կնքված Հարսը: Հիմա յուրաքանչյուրն ունի վերջին հնարավորությունը ընտրելու՝ լինել իմաստուն կույսերի շարքում, թե՞ հիմար կույսերի: Մեր ժամանակի համար տրված Խոսքը դուրս է եկել Աստծուց և տանում է Աստծո մոտ: Այն մեր մեջ կիրականացնի այն, ինչի համար Աստված այն ուղարկել է. ՙԱյնպես էլ պիտի լինի Իմ բերանից դուրս եկած Խոսքը, նա պիտի պարապ ետ չդառնա ինձ մոտ, այլ կատարի իմ ուզածը և հաջողվի նրանում, ինչի համար որ ես նրան ուղարկեցի՚ (Եսայի 55:11): Ամեն: Ամեն: Բոլոր մարգարեները, առաքյալները, Նրա կողմից ուղարկված մարդիկ կատարել են իրենց հանձնարարությունը: Բրանհամ եղբայրը կատարել է այն, ինչ հանձնարարվել է իրեն, ես կատարել եմ այն, ինչ Տերը պատվիրել է ինձ: Հարսը նորից սկսում է համաչափ քայլել, ինչպես Բրանհամ եղբայրն է ասել 1964 թվականի հուլիսի 5-ին՝ ՙԽոսքի հետ կատարյալ ներդաշնակությամբ՚: 2018 թվականի դեկտեմբերին կլրանա կյանքիս 85-րդ տարին: Ամենամսյա ճանապարհորդությունների ժամանակը դանդաղ մոտենում է ավարտին: Ամեն բան տկարացել է՝ քայլելը, տեսողությունը, լսողությունը, բայց սրտում գրված Խոսքը մնում է: Գոհություն Աստծուն, որովհետև հնարավորություն է տվել որ ողջ աշխարհում բոլոր այս եկեղեցիները և տնային խմբերը լսեն, տեսնեն և ապրեն այն, ինչ Աստված անում է ներկայում: Ողջ սրտով շնորհակալություն եմ հայտնում ողջ աշխարհում բոլորիդ ձեր աղոթքների համար: Թող հավատարիմ Աստված բոլորիդ օրհնի և ձեր կյանքում իրականություն դառնա հավիտենապես ճշմարիտ հավատքը: Որքան որ հաստատ է, որ դուք հավատում եք աստվածաշնչյան պատգամին, նույնքան հաստատ է, որ կհասնեք կատարելության և կմասնակցեք հափշտակությանը: Գոհություն եմ հայտնում իմ Տիրոջը, ով 1981 թվականի հունվարին ինձ ցույց տվեց հափշտակության գերբնական, տպավորիչ փորձառությունը: Այո, բոլորս միասին կհափշտակվենք: ՙՈրովհետև Տերն արդարությամբ մի կարճ ու համառոտ բան կանի. Տերը երկրի վրա մի վճռական բան կանի՚ (Հռոմ. 9:28): Բոլորդ իմացել եք, որ մեր սիրելի եղբայր Հելմուտ Միսկիսը գնացել է հավիտենական տուն: Կուզեի այստեղ շեշտել, որ մեր սիրելի եղբայրը Տիրոջ կողմից օրհնվել և օգտագործվել է առանձնահատուկ կերպով, լինի դա ընտանիքում, թե իր զավակների ընտանիքում, տեղական եկեղեցում, կամ իր առաջնորդած կիրակնօրյա դպրոցում, երիտասարդական հավաքույթներին կամ էլ պորտուգալերեն խոսող երկրներում: Ամենուրեք նա թողել է օրհնության հետքեր: Մենք մաղթում ենք մեր Տիրոջ մխիթարությունն ու օրհնությունները մեր թանկագին քույր Էրիկա Միսկիսին և ողջ ընտանիքին: Կլաուդիո Միսկիս եղբայրը ստանձնել է Բրազիլիայի և պորտուգալերեն խոսող մյուս երկրների հավատացյալների հոգևոր ծառայությունը: Գոհանում ենք Աստծուց, որ ամեն ինչի համար հոգ է տանում, որ ամեն բան ընթանա այնպես, ինչպես նախկինում: Տարեվերջի և գալիք տարվա համար բոլորիդ մաղթում ենք Բարձրյալի հատուկ օրհնությունները: Թող սա լինի հոբելյանական տարի (Ղևտ. 25:8-13, Ղուկաս 4:16-21): Թող հավատարիմ Աստված օրհնի բոլորիդ բոլոր ազգերում և լեզուներում: Հիշեք ինձ ձեր աղոթքներում: Իմ անկեղծ երախտագիտությունը: Գործելով Աստծո հանձնարարությամբ՝ Էվալդ Ֆրանկ