Մեծ երախտագիտությամբ ենք փառաբանում Աստծո ողորմությունը: Չնայած բոլոր անհասկանալի զրպարտություններին և միտումնավոր վարաբեկումներին, որոնք սկսվեցին 1979 թվականից, Աստված ողորմություն է արել մեզ: Ոչ միայն նորից օրհնվեց տեղական եկեղեցին, այլև միսիոներական գործը աշխարհով մեկ: Ողջ շրջանից մոտ 200-300 եղբայրներ և քույրեր են գալիս մեր ամենշաբաթյա հավաքույթներին: Ամսվա առաջին շաբաթ-կիրակին մոտ 1200 հավատացյալներ են գալիս ողջ Եվրոպայից և աշխարհի ամենահեռավոր վայրերից, որոնք գալիս են Աստծո Խոսքը լսելու: Ամեն ամսվա առաջին շաբաթ-կիրակի տեղի ունեցող հավաքույթների ուղիղ հեռարձակումները վերջին ամիսներին զգալիորեն շատացել են՝ հասնելով մի քանի հազարի 172 երկրներում: Բրանհամ եղբոր առանձնահատուկ ծառայությունն ավարտվեց 1965 թվականին: Հետո եկան 1965-1979 թվականների մեծապես օրհնված տարիները, և հիմա մենք նայում ենք հետ՝ անցած 40 տարիներին, որոնց ընթացքում Տերը մեզ հետ է եղել ավելի, քան խնդրել ենք կամ մտածել: Գիտե՞ք, թե Բրանհամ եղբայրն ինչպես էր թողել իր Աստվածաշունչը տանը այն օրը, երբ այլևս չվերադարձավ: Այն բացված էր իր աշխատասենյակի սեղանին Երկրորդ Օրինաց գրքի վերջին գլխում և Հեսուի գրքի առաջին գլխում: Մովսեսի առաջնորդությամբ տեղի ունեցավ Եգիպտոսի գերությունից դուրս գալը, իսկ Հեսուի առաջնորդությամբ՝ մուտքը ավետյաց երկիր: Բրանհամ եղբոր ծառայությամբ սկսվեց կանչը դուրս գալու հարանվանությունների գերությունից, իսկ հիմա սկսվել է Աստծո զավակների մուտքը բոլոր խոստումների մեջ: Երբ Բրանհամ եղբայրը խոսեց յոթերորդ կնիքի վերաբերյալ, նա վերջին րոպեներին այսպես աղոթեց. ՙՀիմա Տեր, խնդրում եմ, որ ինձ օգնես: Ես սկսում եմ կամաց-կամաց մարել Տեր: Ես գիտեմ, որ իմ օրերը շատ երկար չեն լինելու և խնդրում եմ, որ ինձ օգնես: Տեր, թող ես լինեմ հավատարիմ, ազնիվ և անկեղծ, որ տարածեմ այս պատգամը, որը հանձնարարված է ինձ տանել: Եվ երբ գա ժամանակը, որ մտնեմ իմ հանգիստը, երբ իջնեմ գետը, ու ալիքներն ինձ տանեն, ո՜վ Աստված, թող ես հանձնեմ այս հին սուրը մեկին, որը անկեղծ կլինի և կտանի Ճշմարտությունը՚: Կարո՞ղ եմ հարցնել, թե ով է առաջինը պատգամը տարել արևմտյան Եվրոպայում և արևելյան Եվրոպայում, Ասիայում, Աֆրիկայում և ողջ աշխարհում: Երկրի վրա կա՞ մեկը, որը լսել է Տիրոջ ձայնը, Աստծուց կանչ է ստացել և առաջադրանք է կատարել Փրկության ծրագրում: Նրանք, ովքեր Աստծուց են, լսում են Աստծո խոսքերը (Հովհ. 8:47) և նրանք ճանաչել են վերջին պատգամի նպատակը՝ դուրս կանչվել, վերականգնում, բաժանում և պատրաստություն Քրիստոսի մոտալուտ վերադարձից առաջ: Նրանք, ովքեր հավատում են, որ հիմա կատարվում է մի ծառայություն, որն անմիջականորեն կապված է Աստծո Փրկության ծրագրի հետ, երանելի աչքեր ունեն, որոնցով տեսնում են, և երանելի ականջներ, որոնցով լսում են (Ղուկաս 10:23), և նրանք կմասնակցեն հափշտակությանը որպես Աստծո կողմից օրհնված մարդիկ: Բրանհամ եղբայրը պատգամը չի տարել որևէ այլ երկիր, որովհետև 1963 թվականի մարտին կնիքների բացումից հետո նա այլևս չի եղել ոչ մի արտասահմանյան երկրում: Ներկայումս ես կարող եմ հետ նայել այն բազում տարիներին, որոնց ընթացքում անձամբ քարոզել եմ աստվածաշնչյան պատգամը աստվածային անմիջական հանձնարարությամբ 165 երկներում, ողջ երկրի վրա բազմաթիվ քաղաքներում՝ Մոսկվայում, Պեկինում, Կահիրեում, նաև Դամասկոսում: Եթե ավելացնենք բոլոր հեռուստահաղորդումները, ուրեմն ես ունեցել եմ ավելի քան տասնմեկ հազար քարոզ: Ներկայումս հեռուստահաղորդումները կանոնավոր կերպով հեռարձակվում են 72 երկրներում և ըստ հեռուստակայանների վիճակագրության դրանք լսում են 10-12 միլիոն մարդ: Տեր Աստված շնորհել է նաև Իր առանձնահատուկ շնորհքը, որ ես թարգմանեմ Բրանհամ եղբոր քարոզները և գրեմ բոլոր այդ գրքերը, գրքույկները և շրջաբերական նամակները: Ես ծախու եմ առել ժամանակը և օդով 24 միլիոն կմ եմ անցել ամենամսյա միսիոներական ճանապարհորդությունների ժամանակ: Մի բան է ինձ խորապես վշտացնում՝ 1979 թվականից հետո տարբեր քաղաքներում տարբեր այսպես կոչված պատգամի եկեղեցիներ հայտնվեցին: Մինչդեռ Սուրբ Գրքի համաձայն միայն մեկ Աստծո ճշմարիտ եկեղեցի կա մեկ քաղաքում: Մյուսները մարդկային ազդեցությամբ ինքնակոչ խմբեր են, որոնք հատուկ մեկնություններ են տարածում՝ վկայակոչելով մարգարեին: Պողոսը զգուշացրել է. ՙԵղբայրներ, աղաչում եմ ձեզ, որ զգուշանաք նրանցից, ովքեր հերձվածներ են ու գայթակղություններ են սարքում այն վարդապետությունից դուրս, որ դուք սովորել եք. նրանցից հեռու քաշվեցեք՚ (Հռոմ. 16:17): Աստված Ինքն է հաստատել ծառայությունները Եկեղեցում (Եփես. 4:11, 1 Կորնթ. 12:28): Նաև Նա է անձամբ տվել այս վերջին հանձնարարությունը: Բոլոր հեռացած եղբայրները գնում են իրենց սեփական ճանապարհով և անարգում են Խոսքը: Բոլորը վկայակոչում են մեջբերումները և դրանց պատճառով կազմավորվում են բոլոր այդ խմբերը: Ինձ համար ուժի մեջ է մնում գրվածը. ՙՈրովհետև մենք ոչ թե վարպետությամբ հնարված առասպելների հետևելով ձեզ ցույց տվեցինք մեր Տեր Հիսուս Քրիստոսի զորությունն ու գալուստը, այլ Նրա մեծափառությանն ականատես լինելով... Եվ մարգարեական ավելի հաստատ խոսքն ունենք, որ եթե դրան ուշադրություն դարձնեք, լավ կանեք, որ մութ տեղը լույս է տալիս, մինչև որ օրը լուսանա, և առավոտյան աստղը ծագի մեր սրտերում՚ (2 Պետրոս 1:16, 19): Բոլոր այս տարիների ընթացքում չեմ բանավիճել մեջբերումների վերաբերյալ և քարոզել եմ միայն Խոսքը: Մենք լսում ենք և կարդում ենք քարոզները ու թողնում ենք այնպես, ինչպես կա: Գոհություն Աստծուն, որովհետև կարող եմ ինձ վերագրել 2 Տիմ. 4:17 համարում գրվածը. ՙԲայց Տերն ինձ հետ կանգնեց և զորացրեց ինձ, որպեսզի իմ միջոցով պատգամը լրիվ քարոզվի, և բոլոր հեթանոսները լսեն: Եվ ես ազատվեցի առյուծի բերանից՚: Ողջ աշխարհում մենք ծառայում ենք ընտրյալներին, որոնք հավատում են Աստծո խոստումներին՝ այս ժամանակի համար տրված հոգևոր կերակուրի հետ: Տիրոջ ուղարկածների վերաբերյալ Նա պարզ ասում է. ՙՁեզ լսողն ինձ է լսում և ձեզ մերժողն ինձ է մերժում, իսկ ինձ մերժողն էլ ինձ ուղարկողին է մերժում (Ղուկ. 10:16): Ամեն: Դա այդպես է: Մենք տեսնում ենք, որ մեր աչքերի առաջ իրականանում է Մատթ.24:14-ում գրվածը. ՙԵվ արքայության այս Ավետարանը ամբողջ տիեզերքում կքարոզվի՝ բոլոր ազգերին վկայություն լինելու համար, և այն ժամանակ կգա վերջը՚: Բոլոր ազգերին. սա նախադեպը չի ունեցել: Եվ դա պետք է լինի սկզբնական, հավիտենական Ավետարանը. ՙՏեսա երկնքում թռչող մի ուրիշ հրեշտակի, որ հավիտենական ավետիս ուներ, որպեսզի ավետարաներ երկրի վրա բնակվողներին, ամեն ազգի ու ցեղի, ամեն լեզվի ու ժողովրդի՚ (Հայտն. 14:6)