Շարք 1 թիվ 1

Ա Ս Վ Ա Ծ    Խ Ո Ս Ք Ը

Ուիլյամ Մարրիոն Բրանհամի

միջոցով

Ճ Ա Ն Ա Չ Ե Ք    Օ Ր Ը   

Ե Վ   Դ Ր Ա    Պ Ա Տ Գ Ա Մ Ը

(Recognizing the Day and its Message)

Հուլիսի 26  1964, առավոտ

Բրանհամի խորան

Ջեֆերսոնվիլ, Ինդիանայի նահանգ, ԱՄՆ

«Ասված Խոսքը սկզբնական սերմն է»:

Բարի լույս, սիրելի բարեկամներ: Մի պահ կանգնած մնանք:

1. Մեր Տեր Աստված, կյանքի այս թոհուբոհի և իրարանցման մեջ մենք մի կողմ ենք դրել այս մի քանի ակնթարթները (րոպեները կամ ժամերը, որոնք դու տվել ես մեզ), որպեսզի Քեզ բերենք փառք և օրհնություն, որոնց Դու արժանի ես, քարոզենք Քո Խոսքը և ավելի լավ ճանաչենք Քեզ: Դրա համար ենք մենք հավաքվել այստեղ այս առավոտ: Մենք գոհանում ենք Քեզանից, ով Աստված, այս մարդկանց համար, ովքեր հոժարությամբ եկել են Քեզ լսելու: Չնայած հանգամանքներին և այն ժամանակին, որում ապրում ենք, նրանք մնացել են հավատքի մեջ, և մենք գոհանում ենք Քեզանից դրա համար:

2. Ո’վ Աստված, մենք  շնորհակալ ենք Քո մեծ, բժշկարար զորության և  Քո Խոսքի խոստումների համար: Ինչպե~ս են մեր սրտերը վառվում, երբ լսում ենք այդ վկայությունները: Ամեն տեսակ նեղություններ են հասել մարդկանց որդիներին, բայց Քո շնորհքով ու զորությամբ, Քո խոստումով բժշկել ես նրանց և հիմա նրանք այստեղ են  և վկայում են Քո մասին՝ փառավորելով Քեզ, ո’վ Աստված: Գոհություն Քեզ դրա համար: Թող որ կարողանանք լսել այն պատգամը, որ պատրաստել ես այս ժամի համար: Թող որ Քո Խոսքը կարդալիս հասկանանք մեր կարդացածը: Թող ամեն բանում Քո կամքը կատարվի:  Խնդրում ենք Հիսուսի Անունով: Ամեն: Կարող եք նստել:

3. Առանձնաշնորհում է այս առավոտ լինել այստեղ: Երջանիկ եմ ձեզանից յուրաքանչյուրի համար: Վուդ եղբայրը, Ռոյ Ռոբերսոն եղբայրը և ուրիշ շատ եղբայրներ հավատարմորեն աշխատեցին այս վերջին երկու օրերի ընթացքում՝ այս դահլիճում օդափոխիչներ տեղադրելու համար, որովհետև անցած կիրակի տեսան, թե ինչքան տանջվեցիք: Քանի որ եկեղեցու գանձանակում ձեր ընծաներից հավաքված մի քիչ փող կար, նրանք դա օգտագործեցին, որպեսզի ձեզ համար հարմարավետ լինի պատգամը լսելու ժամանակ: Այսօր շատ ավելի հով է, քան անցած օրը: Այնքան շնորհակալ ենք Տիրոջը և ձեզ, որ աշխատել եք:

4. Ուրախ եմ, որ Ռոյ Բորդըրս եղբայրն այստեղ է: Այս առավոտ նա մտադիր էր մնալ հետևում: Ես նրան ասացի աթոռը վերցնել և գալ նստել հովիվների հետ, բայց  նա չէր ուզում: Ինչպես բոլորդ գիտեք, Բորդըրս եղբայրն է մեզ ներկայացնում ավետարանչության դաշտում: Այնքան ուրախ ենք, որ Բորդըրս եղբայրն այստեղ է, նաև մյուս հովիվները և բարեկամները:

5. Շաբաթվա ընթացքում մտածում էի. «Երբ կիրակի օրն իջնեմ այնտեղ, կճանաչեմ յուրաքանչյուր հովվին, յուրաքանչյուր անձնավորությանը»: Բայց երբ հասնում ես այստեղ, այնքան ես տարվում պատգամով, որ մնացած ամեն ինչի մասին մոռանում ես:

6. Անհրաժեշտ կլինի, որ ես վերադառնամ Արիզոնա: Մեկ շաբաթ հետո, եկող երկուշաբթի պետք է վերադառնամ Թուսոն՝ երեխաներին դպրոց տանելու համար: Հետո կվերադառնամ: Կինս պետք է նախօրոք այնտեղ լինի, որովհետև պետք է երեխաներին դպրոցում գրանցի երկու շաբաթ առաջ: Այնուհետև որոշ ժամանակով կվերադառնամ այստեղ:

7. Այժմ իմ արձակուրդի ժամանակն է: Ինչպես գիտեք՝ դեկտեմբերից քարոզում եմ, իսկ հիմա հուլիսն է: Հիմա, եթե Աստված կամենա, և   առանձնահատուկ հրավեր չստանամ, այս ժամանակ կհանգստանամ, արձակուրդ կվերցնեմ. կգնամ որսորդության:

8. Բայց հնարավոր է, որ Աստված ինձ կանչի ուրիշ բանի համար. այն ժամանակ ծրագիրս կփոխվի: Աստված միշտ առաջինն է, և ես ուզում եմ, որ Նա առաջինը լինի: Եվ դուք էլ ուզում եք, որ Նա առաջինը լինի: Բայց եթե որևէ առանձնահատուկ հրավեր չլինի և եթե Աստծո կամքը լինի, եկող երկու ամիսների ընթացքում կգնամ որսորդության:

9. Դուք չեք կարող հասկանալ, և աշխարհն էլ երբեք չի իմանա, թե ինչի միջով եմ ես անցնում: Դա այնպիսի լարվածություն է: Զարմանալի չէ, որ Տերն ասաց Իր աշակերտներին, երբ քայլում էր նրանց հետ. «Գնանք անապատ տեղ մի պահ հանգստանալու»: Ես օրեցօր  ավելի լավ եմ հասկանում դա, հատկապես, որ գնալով ծերանում եմ: Ծերանալուց հետո եք դա հասկանում: Ձեր հովիվն էլ է համաձայն դրա հետ: Հիսուն տարեկանից հետո հասկանում ենք, որ այլևս երիտասարդ տղաներ չենք: Այժմ մեզ քիչ ժամանակ է մնում:

10. Մենք իսկապես շնորհակալ ենք բոլոր այն վկայությունների համար, որ քիչ առաջ լսեցինք: Երեկ կինս տիկին Վուդսի տանն էր, երբ Ալաբամայից մարդիկ եկան պատմելու այն մեծամեծ բաների մասին, որ Տերն արել էր այն մի քանի հավաքույթների ընթացքում: Նաև ասացին, որ փոքրիկ երեխաներ են բժշկվել, ուրիշ շատ բաներ են կատարվել, բայց այսօր շատ ժամանակ  կպահանջվեր, եթե բոլորը պատմեի:

11. Ինձ ասացին, որ արդեն երկու կիրակի է, որ Լարսոն քույրը գալիս է այստեղ փոքրիկ մանկիկի հետ: Կարծում եմ, որ դա նրա թոռներից մեկն է և նա ուզում է ընծայել նրան Տիրոջը: Մինչ ես խոսում եմ, Լարսոն քույրը փոքրիկին կարող է բերել ընծայման համար:

12. Մինչ նա պատրաստվում է, կուզենայի ասել, որ այսօրվա պատգամը իմ պատրաստած պատգամների մեջ ամենադժվարներից մեկն է: Ողջ շաբաթվա ընթացքում հաճախ ցանկացել եմ գնալ իմ սենյակը, ինչպես որ առաջնորդված էի զգում և փորձում էի ինչ-որ բան ստանալ հավաքույթի այս ժամի համար: Ամեն անգամ երբ մտնում էի այնտեղ, դատարկություն էի զգում գլխումս: Երեկ ուժեղ շոգի պատճառով մտա ներքնահարկ: Ես վերցրել էի իմ Աստվածաշունչը և փորձում էի ինչ-որ բան կարդալ, բայց ննջեցի: Հետո վեր կացա, մի բաժակ ջուր խմեցի և փորձեցի սթափվել: Հետո դուրս եկա մի քիչ զբոսնեցի և նստեցի աստիճանին:

13. Ինչ-որ մեկն եկավ և ինձ հանկարծակիի բերեց, երբ ես հանել էի վերնաշապիկս: Այնքան շոգ էր: Ինչ-որ մեկը (չգիտեմ հարևան էր, թե եկեղեցու անդամներից մեկը) ինձ ձեռքով արեց: Այնքան խորասուզված էի մտքերիս մեջ, որ պատահաբար գլուխս բարձրացրի այդ պահին և նրան ձեռքով արեցի:

14. Երեկ երեկոյան մեքենա նստեցի Չարլստոն գնալու համար. փորձում էի ինչ-որ բան ստանալ: Կարծես Տերն ուզում էր ինչ-որ բան ասել ինձ, բայց սատանան փորձում էր կանգնել իմ ճանապարհին, որպեսզի ինձ խանգարեր ստանալու այդ: Այդ ժամանակ մտածեցի. «Եթե նա անի այդ, ես, հակառակը, պետք է հարատևեմ սպասելու մեջ և շարունակեմ դուռը թակել, մինչև Նա բացի»: Այս առավոտ հանդիպեցի սուրբգրային մի հատվածի, որը մեծ տպավորություն թողեց ինձ վրա: Դա ժամը յոթից հետո էր: Ես իրոք շատ վաղ էի արթնացել:

15. Երեկ ինձ լավ չէի զգում: Եգիպտացորեն էի կերել, որի պատճառով մարսողության խանգարում էի ունեցել:  Կարծում եմ՝ չափազանց կծու էր, և ես փորձում էի դուրս գալ այդ վիճակից: Իսկ այս առավոտ հանդիպեցի սուրբգրային մի հատվածի, որն իրոք զարմացրեց ինձ: Ես նորից կարդացի: Ես իսկապես զարմացած էի: Շարունակեցի սերտել Սուրբ Գիրքը ևս մի քանի րոպե: Հնարավոր է, որ Տերն այսօր մի պատգամ է պատրաստել մեզ համար, իսկ սատանան փորձում է մեզ հեռացնել դրանից:

   Քույր Լարսոն, ուզու՞մ եք բերել փոքրիկին: (Բրանհամ եղբայրը կատարում է երեխայի ընծայումը. ծան. խմբ.): Թող Աստված լինի նրանց հետ և օգնի նրանց:

16. Անցած կիրակի ես ձեզ պահեցի երկու հավաքույթի համար՝ առավոտյան և կեսօրից հետո, և կարծում եմ, որ դժվար էր ձեզ համար: Կարծում եմ, որ ձեզանից ոմանք գալիս են հեռվից և ստիպված են լինում կորցնել մեկ աշխատանքային օր: Այսպես, թեև երկուշաբթի օրը մեկնում ենք մեկ շաբաթով, եկող կիրակի օրվա համար հավաքույթ եմ նախատեսում, Տիրոջ կամքով, եթե  միայն եկեղեցին չի ուզում մնալ ողջ գիշեր: Դուք այնքան շատ եք: Ովքե՞ր են նախընտրում մնալ այս երեկո: Իսկ ովքե՞ր են նախընտրում վերադառնալ եկող կիրակի: Ո՛հ, երկու դեպքում էլ ցանկացողները շատ են:

17. Այս առավոտ երկար պատգամ ենք ունենալու: Շատ լավ գիտեմ, որ պետք է ջանամ հարգել եկեղեցու կարգուկանոնը, բայց, եթե լավ եք հիշում, երբ այդ մասին քարոզեցի, ասացի. «Բացի այն դեպքից, երբ ձայնագրում եմ»: Իսկ սա ձայնագրություն է: Ի վերջո, կարծում եմ, որ կաշխատենք վերադառնալ այս երեկո, բայց նաև եկող կիրակի, եթե Տերը կամենա:

18. Կարծում եմ, որ կվերադառնանք այս երեկո և եկող կիրակի, եթե Տերը կամենա: Չէի ցանկանա ձեզ ստիպել, որ վերադառնաք երկու անգամ, բայց ժամանակը սուղ է: Լավ մտածեք. ինչ-որ բան կկատարվի, և մենք այլևս հնարավորություն չենք ունենա իրար հանդիպելու. կամ օրենքը մեզ կարգելի կամ սատանան կփորձի սողոսկել ձեր մեջ՝ ձեզ ցրելու համար:  Ուրեմն գնահատենք ամեն ակնթարթը, որում կարող ենք միասին լինել:

19. Նրանք, ովքեր այս երեկո տուն պետք է վերադառնան, թող իմանան, որ երեկոյան կարճ պատգամ է լինելու անցած կիրակի օրվա նման: Եվ անշուշտ, կարող ենք ձեզ ուղարկել ձայնագրությունը: Կամ էլ Աստծո կամքով կարող եք քարոզը լսել այս երեկոյան:

20. Երեկ կամ երեկ չէ առաջին օրը ես հիշողությամբ նշումներ էի կատարել մի փոքրիկ պատգամի վերաբերյալ, որը վաղուց կար: Իրականում խոսքը երկու պատգամների մասին է, որոնցից մեկը «Ծակոտ գուբեր»-ն է, մյուսը՝ «Քամի ցանողը փոթորիկ կհնձի»: Դա պարզապես ավետարանչության պատգամ էր: Այս առավոտ վարդապետական պատգամ կլինի: Իսկ այս երեկո կխոսեմ կամ «Ծակոտ գուբեր» պատգամի կամ էլ  «Քամի ցանողը փոթորիկ կհնձի» պատգամի վերաբերյալ:

21. Իսկ հիմա ուզում եմ կարդալ Սուրբ Գրքից: Հարմա՞ր եք նստած: Ասեք՝ ամեն(Եկեղեցին պատասխանում է՝ ամեն): Այժմ կցանկանայի, որ ինձ հետ բացեիք Աստվածաշունչը, Ովսե մարգարեի գիրքը: Մի քանի համարներ կնայենք Ովսե մարգարեի գրքից: Վեր կենանք:

22. «Ո’վ Աստված, մենք արժանի չենք մեր ձեռքը վերցնելու այս Գիրքը, որովհետև Սուրբ Գրքում կարդում ենք, որ ոչ ոք ո’չ երկնքում, ո’չ երկրի վրա, ո’չ էլ երկրի ընդերքում արժանի չէր վերցնելու այդ Գիրքը, ոչ էլ նայելու դրան (Հայտն. 5-րդ գլուխ): Մինչդեռ եկավ Մեկը, որ նման էր մորթված Գառնուկի: Նա վերցրեց Գիրքը, որովհետև արժանի էր և բացեց դրա կնիքները: Մենք պատրաստ ենք նայելու այն բոլոր բաներին, որոնք գրված են Գրքում, և որոնք Դու ուզում ես հայտնել մեզ, որովհետև սա Փրկության Գիրքն է: Բոլոր փրկագնվածները գրված են այս Գրքում: Թող որ այս առավոտ գտնենք մեր տեղը այն ժամանակներում, որոնցում ապրում ենք: Խնդրում ենք Հիսուսի Անունով: Ամեն»:

«Եկեք ու ետ դառնանք Տիրոջ մոտ,

Որ Նա պատառեց և Նա էլ կբժշկի մեզ.

Նա զարկեց, Նա էլ կպատի մեզ:

Նա մեզ կկենդանացի երկու օրից հետո,

Երրորդ օրը Նա մեզ կկանգնեցնի,

Եվ մենք կապրենք Նրա առաջ:

Եվ կճանաչենք և կհետևենք ճանաչելու Տիրոջը,

Արշալույսի պես պատրաստ է Նրա ելքը,

Եվ Նա պիտի գա մեզ համար  անձրևի պես,

Վերջին անձրևի պես, որ ոռոգում է երկիրը:

Ի՞նչ անեմ քեզ, ո’վ Եփրեմ,

Ի՞նչ անեմ քեզ, ո’վ Հուդա,

Որ ձեր բարությունը առավոտյան ամպի պես է

Եվ վաղահաս ցողի նման է, որ անցնում է:

Նրա համար տաշեցի մարգարեներով,

Նրանց սպանեցի Իմ բերանի խոսքերով,

Եվ Քո դատաստանները  դուրս կգան իբրև լույս:

Որովհետև ողորմություն եմ ուզում, ոչ թե զոհ,

Եվ Աստծո գիտություն ավելի քան ողջակեզներ:

Բայց նրանք Ադամի պես ուխտը զանց են անում,

Այնտեղ ինձ անհավատարմություն արին:

Գաղաադը անօրենություն անողների քաղաք է, շաղախված է արյունով:

Ավազակները մարդու դարան մտնելու պես քահանաների խումբը

Սյուքեմի ճանապարհում մարդիկ են սպանում

Եվ եղեռնագործություն անում:

Իսրայելի տանը սոսկալի բաներ տեսա,

Այնտեղ է Եփրեմի պոռնկությունը, Իսրայելը պղծվեցավ:

Քեզ համար էլ ո’վ Հուդա, մի հունձք կա,

Երբ Ես ետ կդարձնեմ Իմ ժողովրդի գերությունը» (Ովսե 6-րդ գլուխ):

23. Տեր Հիսուս, Սուրբ Հոգով տուր մեզ շարունակությունը և դրա համար նախատեսված համատեքստը: Մենք սպասում ենք, որ Դու մեզ հասկացնես այդ: Հիսուսի Անունով: Ամեն:

24 Այս առավոտի համար իմ թեման սա է. «Ճանաչեք օրը և դրա պատգամը»: Հիմա կուզենայի, որ ուշադրություն դարձնեիք դարերի ընթացքում Իսրայելի ունեցած դերին: Մենք այդ մասին խոսեցինք  կիրակնօրյա դպրոցի անցած դասի ժամանակ, երբ խոսում էինք փող հնչեցնելու տոնի մասին: Եվ հիմա կուզենայի ձեր ուշադրությունը հրավիրել Աստծո ժամանակագրության մեջ Իսրայելի դերի վրա:

25. Կուզենայի, որ կիրակնօրյա դպրոցի այսօրվա դասի ժամանակ հասկանայիք և ճանաչեիք այն ժամանակը, որում ապրում ենք: Ինչպես կարող եք տեսնել, այդ ժամանակը վերջանալու վրա է: Հենց դրա համար պետք է, որ ճանաչեք ժամը և ժամանակը, ինչպես նաև նշաններն ու այն պատգամը, որը պետք է ընդունեք:

26. Անցած կիրակի քարոզի ժամանակ որոշել էինք խոսել Հայտնության վերջին յոթ փողերի վերաբերյալ: Ես ինքս իմ մեջ մտածում էի, որ դա կկատարվեր նույնքան փառավոր կերպով, որքան կնիքների բացման ժամանակ: Ես նկատել էի, որ ամեն կնիքի բացման ժամանակ ինչ-որ արտասովոր բան էր կատարվում: Երբ քարոզեցինք եկեղեցու յոթ շրջանների վերաբերյալ, այնքան կատարյալ էր, որ Սուրբ Հոգին Ինքը իջավ և հաստատեց պատգամը: Դա հայտնվեց նույնիսկ թերթերում և տեսանելի դարձավ ողջ ազգի համար: Նա փառավոր կերպով դա ցույց տվեց երկնքում՝ լուսնի խավարման միջոցով և դրանով ամիսներ առաջ մեզ ցույց տվեց, թե դա ինչպես էր կատարվելու: Նա այդ ցույց տվեց հենց այս խորանում: Նա այդ ցույց տվեց նաև այս ժամանակի ազգերի վիճակի միջոցով, երբ Հռոմի նվիրապետությունը գնաց Պաղեստին: Ասացին, որ դա առաջին Պապն է Պետրոսից հետո, որը գնացել է այդ կողմերը. նրանք ենթադրում են, որ Պետրոսը իրենց առաջին Պապն է եղել: Դա ցնցող էր:

27. Այս շենքում մինչև բոլոր խորհուրդները պարունակող կնիքների բացումը ես գրատախտակի վրա նկարել էի մի գծանկար, որը վերաբերում էր եկեղեցու շրջաններին: Ես դա նկարում էի ըստ իմ տեսած տեսիլքի, առանց իմանալու, որ մեկուկես տարի հետո Աստված ապացուցելու էր այդ լուսնի խավարման միջոցով, որի լուսանկարները տարածվեցին երկրի բոլոր ազգային թերթերում: Քարոզելու ժամանակ ես չգիտեի, որ այդ խորհրդավոր երևույթը ներկայացնում էր Լավոդիկեի ժամանակաշրջանը:

28. Լրագրերում հայտնվեցին միայն 6 լուսանկարներ, որոնք ներկայացնում էին 6 ժամանակաշրջանները: Պատճառն այն է, որ Լավոդիկեի եկեղեցուն պատկանող շրջանը լիովին խավարի մեջ էր: Նկատեք, թե ինչպես Աստված այդ ցույց տվեց երկնային երևույթի միջոցով. երբ ես ինքս նկարեցի գրատախտակի վրա, ինչպես տեսնում եք, լույսի մի փոքր նշույլ թողեցի, որը ցույց էր տալիս եկեղեցու վիճակը մինչև ընտրյալների հափշտակությունը: Դրա համար ես այդպես ներկայացրի յոթերորդ շրջանի եկեղեցին: Բայց երբ Աստված ցույց տվեց Իր ծրագիրը երկնքում, այդ փուլը լիովին խավարի մեջ էր: Գուցե դա նշանակում է, որ Լավոդիկեի վերջին ընտրյալը արդեն կանչվել է: Մենք դա չգիտենք: Դրա վերաբերյալ մի ամբողջ քարոզ կարելի էր անել:

29. Նկատենք նաև սա. մինչև յոթ կնիքների մասին քարոզելը, ես գաղափար չունեի, որ դա այդպես կլիներ: Երբ դեռ այս շենքում էի, Նա ինձ ասաց դրա վերաբերյալ և ինձ ուղարկեց Թուսոն՝ Արիզոնա, որտեղ ես հաղորդեցի, թե ինչ էր կատարվելու: Այստեղ ձեր մեջ մի մարդ կա, որը ներկա էր, երբ դա տեղի ունեցավ: Աստված ինձ ասաց, որ յոթ հրեշտակներ կհայտնվեն: Լրագրերն ու ամսագրերը դա տարածեցին ազգով մեկ. լույսի խորհրդավոր շրջան՝ բուրգի նման մի ամպ՝  ճիշտ այնպիսին, ինչպիսին ես նկարեցի և ցույց տվեցի ձեզ այստեղ: Ամպը բարձրացավ այն վայրի վերևում, որտեղ հրեշտակներն էին, Արիզոնայի Թուսոնում, և հասավ  40 կիլոմետր բարձրության և մոտ 50 կիլոմետր լայնության: Այն տեսանելի էր նահանգի ողջ տարածքում:

30. Այս ամենը չի ասվում այս փաստի միջոցով ձեզ վրա ճնշում գործադրելու համար, այլ որ հասկանաք այս ժամի հոգևոր նշանակությունը:

31. Դրան հետևող պատգամը բացեց յոթ կնիքները, որոնք բացահայտեցին Աստվածաշնչում եղած բոլոր խորհուրդները: Դրանք այն ուսմունքներն են, որոնց վրա ողջ աշխարհը հարձակվում է կատաղությամբ՝ ասելով, որ դրանք սխալ են:

32. Վերջերս Արիզոնայում խառնում էին ձայնագրությունները՝ փորձելով ստիպել ինձ ասել այն, ինչ ես չէի ասել: Հիշեք Արիզոնայի վերաբերյալ տեսիլքը: Աստվածաշունչն ասում է. «Եվ աշակերտներին ասաց. «Անկարելի է, որ գայթակղություններ չգան, բայց վա’յ նրան, ում ձեռքով կգան: Ավելի լավ է, որ նրա վզից մի աղացքար կախվի, ու ծովը գցվի, քան թե այս փոքրերից մեկին գայթակղեցնի» (Ղուկ. 17:1,2): 

  Աստվածաշունչը նաև ասում է. «Եթե մեկը սրանց վրա բան ավելացնի, Աստված նրա վրա կավելացնի այն պատուհասները, որ գրված են այս գրքում: Եվ եթե մեկն այս գրքի մարգարեության խոսքերից բան պակասեցնի, Աստված նրա բաժինը կպակասեցնի կյանքի գրքից, սուրբ քաղաքից և այս գրքում գրվածներից» (Հայտն.22:18,19):

 Մարդիկ տալիս են իրենց սեփական մեկնությունները տրված Խոսքին՝ փորձելով այնպես անել, որ Աստծո Խոսքն ասի այն, ինչ չի ասել: Սա իմ Խոսքը չէ, Նրանն է:

33. Ինչպես բացատրեցի ձեզ մի կիրակի օր մի քանի շաբաթ առաջ, մենք տեսիլքում տեսանք, թե ինչպես էին պտտվում այդ մարգարեները: Եվ ասել էի. «Շարունակեք պարզապես սպասել: Քանի դեռ ես այսպես պայքարում եմ, Աստված չի կարող պայքարել: Հանձնենք նրան այս հարցը, որովհետև Նա է հոգ տանում Իր Խոսքի համար»:

34. Անցած կիրակի քարոզեցի տոնական օրերի մասին: Զատկի և Պենտեկոստեի (հայերենում՝ հունձքի տոն) միջև 50 օր ժամանակ կար: Պենտեկոստե նշանակում է հիսուն: Իսրայելացիները բերում էին առաջին պտուղները և Աստծուն մատուցում էին ցորենի երեխայրին: Մյուս կողմից, Զատկից հետո Աստծուն որպես գոհություն մատուցում էին գարու երեխայրին (այն հացահատիկը, որը Պաղեստինում առաջինն է հասունանում), նվիրման որայի տեսքով Տիրոջ առջև, մի գառնուկ, յուղով շաղված, բարակ ալյուրով հաց և գինի: Դա ցույց է տալիս Հոգու երեխայրին (առաջին պտուղը), որ թափվեց մարդկանց վրա այդ հիսնօրյա մարգարեական ժամանակահատվածում: Յոթ շաբաթ տևող այդ ժամանակահատվածը ներկայացնում է եկեղեցու յոթ  շրջանները, որոնց ընթացքում Աստված հեթանոսներից ժողովուրդ է կանչում Իր անվան համար:  Եվ մենք անցել ենք Պենտեկոստեի այս երկար տոնի միջով:

35. Իսկապես այդ հիսուն օրերը համապատասխանում են յոթ շաբաթի: Եվ այդ յոթ շաբաթները համապատասխանում են Եկեղեցու յոթ շրջաններին, որոնք պետք է կանչվեն Պենտեկոստեի ժամանակահատվածում: Որովհետև Պենտեկոստեի տոնը խորհրդանշում է ազգերի միջից մի ժողովրդի կանչվելը Իր անվան համար: Այդ յոթ շաբաթների վերջում Քավության օրն էր, այսինքն՝ յոթ փողերի տոնը: Դա ծոմի, զղջման և սուգի օր էր: Այսպիսով, յոթ փողերը վերաբերում են միայն Իսրայելին:

36. Տերն ինձ թույլ չտվեց քարոզել յոթ փողերի վերաբերյալ: Ես պատրաստվում էի հաղորդել, որ խոսելու եմ այդ թեմայով, բայց զգացի, որ ինչ-որ բան արգելում էր ինձ այդ անել: Բիլլին և մյուսները ամեն ջանք արեցին որ ամեն ինչ պատրաստ լինի հաջորդ շաբաթվա համար, նույնիսկ օդափոխիչ սարք տեղադրեցին, բայց Սուրբ Հոգին որոշակի պատճառներով  ինձ թույլ չտվեց քարոզել յոթ փողերի վերաբերյալ: Ես հարցնում էի, թե ինչու և ասացի կնոջս. «Գնում եմ իմ սենյակում աղոթելու»: Ես ամենայն անկեղծությամբ ծնկի եկա Տիրոջ առջև, և Նա ինձ հայտնեց, որ յոթ փողերը փչել են վեցերորդ կնիքի տակ, որոնց վերաբերյալ ես քարոզել էի: Տեսնում եք, այս ամենը կատարվեց Աստծո հզոր ձեռքով, դա վերաբերում է Իսրայելին, և մենք այդ մասին խոսել ենք այն կնիքի ժամանակ, որը վերաբերում էր հրեաների հալածանքին:

37. Հեթանոսների ժամանակահատվածը Պենտեկոստեի տոնի ժամանակ է: Բոլոր փողերը փչել էին յոթերորդ կնիքի ժամանակ: Մենք դա տեսանք անցած կիրակի՝ սերտելով փողերի տոնը: Ինչու՞ համար եղավ վեցերորդ կնիքը: Որպեսզի աշխարհի բոլոր հրեաները  վազեն դեպի իրենց երկիրը: Այսպիսով՝ յոթ փողերը փչեցին վեցերորդ կնիքի ժամանակ:

38. Ներկայումս, յոթերորդ հրեշտակի պատգամով  բոլոր խորհուրդները պետք է բացահայտվեն: Սա այն պահն է, երբ հնչում է կանչը հեթանոսների մեջ եղած 11-րդ ժամվա մշակների համար, որպեսզի նրանք ստանան նույն վարձը, որ ստացան առաջին ժամի մշակները: Հիսուսը սովորեցնում էր, որ բոլոր կանչված մշակները, որ ժամին էլ եկած լինեին, ստացան նույն վարձը, նույնիսկ տասնմեկերորդ ժամին եկածները:

39. Այսպիսով, ամեն բան կատարյալ է: Պենտեկոտեի օրը եկան առաջին ժամի պատգամաբերները՝ բերելով Խոսքը: Որից հետո եկավ խավար ժամանակաշրջան, որը խոչընդոտեց աշխատանքին, հետո օրվա կեսին եկավ Լյութերը, որին շուտով հետևեց Ուեսլին: Հետո եկավ երեկոյան ժամի պատգամը, որով ստանում ենք նույնը, ինչ որ նրանք են ստացել սկզբում: Երեկոյան ժամին տրված պատգամը սահմանված է ամեն բան սկզբնական վիճակին բերելու համար, ինչպես, որ առաջին եկեղեցում էր:

Հարսի վերաբերյալ իմ տեսիլքը

 40. Հիշեք այն տեսիլքը, որ ես ունեցա անցած շաբաթ: Ես պարզապես դուրս էի նայում: Այդ ժամանակ եկավ Հարսը: Իմ կողքին մի ձայն լսեցի, որն ասում էր. «Ահա մի տեսիլք Հարսի վերաբերյալ»: Եվ նա մոտեցավ: Ես նկատեցի, թե ինչպիսին էր նա: Նա երիտասարդ էր և շատ գեղեցիկ,  իսկապես չքնաղ: Նա գալիս էր ներդաշնակ քայլերով, ոչ թե զինվորական երթաքայլով, այլ երիտասարդ կնոջ նազելի քայլվածքով: Նա անցավ իմ  ձախ կողմով և անհետացավ իմ տեսադաշտից:

41. Հետո Նա ինձ նայել տվեց իմ աջ կողմը և ցույց տվեց դարերի ընթացքում եղած բոլոր եկեղեցիները: Ո’հ, որքան անվայել տեսք ունեին նրանք: Վերջինը այս ժամանակների եկեղեցին էր, և նրան մի կախարդուհի էր առաջնորդում: Նրան ներկայացնում էին մի խումբ կանայք: Նրանք անպարկեշտ կերպով էին հագնված, նույնիսկ շատ անպատկառ տեսք ունեին: Նրանք քայլում էին թվիստի և ռոք-ն-ռոլի ռիթմի տակ: Նրանք ինչ-որ մոխրագույն թղթեր էին պահում իրենց առջևում, նրանց շրջազգեստները բաղկացած էին գոտուց կախված ժապավեններից, իսկ գոտկատեղից վերև բոլորովին մերկ էին: Նրանք միայն պահում էին իրենց առջևում այդ մոխրագույն թղթերը: Դա կեղծավոր գույն է, գտնվում է սևի և սպիտակի միջև, ո’չ սև է, ո’չ սպիտակ. խաբուսիկ գույն է: Իսկ Նա ինձ ասաց. «Սա եկեղեցին է»:

42. Այդ  ժամանակ  քիչ էր մնում ուշաթափվեի: Ես մտածեցի. «Եթե սա նա է, ով ներկայանալու է Քրիստոսին որպես Հարս»: Բոլոր այն ջանքերը և գործերը, որ մարդն անում է Քրիստոսին Հարս ներկայացնելու համար, հանգեցրին միայն այն բանին, որ որպես Հարս է ներկայանում այս գռեհիկ, պիղծ և անպատկառ պոռնիկը: Դրանից սիրտս ցավում էր:

43. Երբ վերջինն անցնում էր մեր առջևով, իր առջև պահում էր այն թուղթը և նմանակում ամենաժամանակակից պարերի (թվիստ և ռոք-ն-ռոլ) շարժումները, այսինքն՝ օրորվելով այս ու այն կողմ: Նա հաճույք էր ստանում իր անբարո արարքից:

44. Ես պատասխանատու չեմ այս բաների համար, միայն կրկնում եմ այն, ինչ տեսել եմ, և Աստված իմ Դատավորն է, բայց դա ԱՄՆ-ի եկեղեցին էր:

45. Երբ նա անցավ, ես տեսա, որ նա հետևից բոլորովին ծածկված չէր: Այս անգամ էլ թվաց, թե կուշաթափվեմ և  սրտխառնոց զգացի:

46. Հետո Նա ինձ ասաց. «Հարսը նորից կհայտնվի, ինչպես առաջին տեսիլքում»: Եվ ահա նախորդից հետո նորից հայտնվեց Հարսը: Դա ճիշտ այն Հարսն էր, որ եկել էր սկզբում: Սիրտս թռչում էր ուրախությունից՝ իմանալով, որ նա ունենալու է նույն կերպարանքը և կրելու է նույն հագուստները, ինչպես նա, որ հայտնվեց սկզբում: Նա պետք է պատրաստ լինի մինչև կանչվելը: Գիտեմ, որ դա ճշմարտությունն է: Եթե ոչ, ուրեմն մինչև հիմա ունեցած տեսիլքներս սխալ են եղել: Բայց շատերը գիտեն, որ ինձ ասված բոլոր բաները միայն ճշմարտություն են եղել. բոլորն էլ կատարվել են:

47. Տեսնու՞մ եք ժամանակակից եկեղեցու ապականված վիճակը: Եվ դեռ իրեն եկեղեցի է համարում:

48. Վերջերս Ռադել եղբայրը, իմ սիրելի եղբայրներից մեկը, ինձ ասաց, որ եկեղեցին իրեն թվում է որթի վրա պատվաստված ընձյուղ: Նրան մտահոգում է ներկա իրավիճակը, Հոգու հանդեպ այսօրվա եկեղեցիների անզգայությունը և այն, որ ամեն ինչ սկսում է ավերվել: Ամեն տեղից եկող հովիվներ և քարոզիչներ ինձ հարցնում են. «Ի՞նչ է  կատարվել, Բրանհամ եղբայր»:

49. Ռադել եղբայրն ինձ հարցրեց. «Այս եկեղեցիները սատանայի՞ հոգուց են սնվում, թե՞ ինչ»:

50. Ես նրան պատասխանեցի. «Ո’չ, պատվաստված ընձյուղը սնվում է որթից»: Օրինակ վերցնենք կիտրոնը: Կիտրոնենու ճյուղը կարող է աճել նարնջենու վրա, բայց նարինջ չի բերի, թեև նրանից է սնվում: Այդպես էլ եկեղեցի կոչվածը  պատվաստված ընձյուղի նման է, ապրում է կրոնի, եկեղեցու անվան տակ: Կաթոլիկներն ու բողոքականները պատվաստված ճյուղեր են, որոնք սնվում են  որթից, բայց իրենց սեփական պտուղներն են բերում, որովհետև դարձի չեն եկել: Նրանք Աստծո՝ սկզբից ի վեր սահմանված ծրագրի մեջ չեն: Ահա թե ինչու նրանք մերժում են Խոսքը և բերում են իրենց սեփական պտուղները: Ըստ վերոհիշյալ օրինակի, իսկական ծառը և իր պտուղը նախասահմանված են. միայն նարնջենին է նարինջ տալիս: Հիսուսը մեզ ասել էր. «Ես որթն եմ, դուք՝ ճյուղերը»:

51. Եթե այս ծառը ուրիշ ճյուղեր տա, սկզբից նախատեսված պտուղը կբերի: Ամեն բանի վերականգնում պետք է լինի: Որթի կյանքի վերջում կլինի վերականգնման և նորոգման ժամանակաշրջան, երեկոյան ժամին հայտնված լույս, որպեսզի հասունացնի նրան՝ ներգործելով նրա վրա. ոչ թե որևէ հարանվանության  միջոցով, որը պատվաստված է նրա վրա, այլ որպես Աստծո Խոսքի իսկական պտուղ: Այդ ամենը կկատարվի օրվա վերջում, երեկոյան ժամանակ լույս կհայտնվի: Հասունանալու համար նա լույսի կարիք ունի:

52. Տեսեք, թե որքան կատարյալ է Սուրբ Գիրքը: Որովհետև դա մի օր է, որը ո’չ ցերեկ է կոչվում, ո’չ գիշեր: Պտուղը չի հասունանա, մինչև արևը չլուսավորի նրան: Ինչքան էլ քարոզես, ինչ էլ անես, երբեք հասունության չի հասնի, ոչ էլ կարող է դրսևորվել կամ հաստատվել առանց Նրա, ով ասել է. «Ես եմ աշխարհի լույսը»: Պետք է գա զորությունը, Սուրբ Հոգին Ինքը, որպեսզի հասունացնի այդ, հաստատի, ապացուցի և բացահայտի, որ այն, ինչ Նա ասել է, կատարվում է այսօր: Երեկոյան ժամանակ հայտնված լույսն է բերում այդ: Ո’հ, ինչպիսի ժամանակում ենք ապրում:

53. Հարսը, որին տեսա տեսիլքում, ճիշտ այնպիսին էր, ինչպիսին նա, ում տեսա տեսիլքի սկզբում: Բայց հանկարծ տեսա, որ նա սայթաքեց, և ես փորձեցի բռնել նրան: Իրոք, շատ բան կարելի է ասել սրա վերաբերյալ և այն ժամանակի վերաբերյալ, որում ապրում ենք:

54. Ովսեն մեզ ասում է 6:1 համարում. «Եկեք ու ետ դառնանք Տիրոջ մոտ»: Հիշեք, որ նա ասաց, որ նրանք կցրվեն, և այդպես էլ եղավ: Նա ասաց, որ ցրվելուց հետո կվերադառնան Տիրոջը, և նա կկապի նրանց վերքերը: Եվ հենց այդպես էլ կատարվեց: Նա կբժշկի և կկապի նրանց վերքերը, և ըստ Եզեկիելի մարգարեության 37-րդ գլխի, կյանք կտա չորացած ոսկորներին, որովհետև Եզեկիելը նույնպես կանխասել էր նրանց վերադարձը: Նկատենք, որ Ովսեն ասաց. «Երկու օրից»: Նա մեզ կընդունի և կարթնացնի: Բայց արթնացնել(անգլերենում՝ «revive»` վերակենդանացնել, աշխուժացնել)  չի նշանակում հարություն տալ. այս բառը նույն նշանակությունն ունի, ինչ որ Սուրբ Գրքի ուրիշ տեղերում, և դա նշանակում է «արթնություն» (անգլերենում՝ «revival»՝ արթնություն, աշխուժացում): Նա մեզ կարթնացնի երկու օրում: Այս կյանքի նորոգությունը մեզ տանում է դեպի երրորդ օր, այն բանից հետո, երբ նրանք ցրվեցին, կուրացան, պատառվեցին:

55. Գիտե՞ք, որ հրեաները կուրացան նրա համար, որ մենք տեսողություն ստանանք: Որպես ազգ նրանք պատառվեցին և ցրվեցին: Նրանք մերժեցին իրենց Մեսիային, որպեսզի մենք կարողանանք ընդունել Նրան, որպեսզի հեթանոսների միջից կանչված ազգը կրի Իր անունը:

56. Կինը ստանում է իր ամուսնու անունը: Այս կույր հեթանոսները նույնիսկ չեն կարողանում տեսնել Տեր Հիսուս Քրիստոսի անունը մկրտության մեջ: Դա շատ ծանր բան է, բայց պետք է, որ այդպես լինի: Միայն նա կարող է տեսնել, ով նախասահմանված է, ուրիշ միջոցներով երբեք չեք տեսնի: Հրեաները չէին կարող հասկանալ, որ Հիսուսն է իրենց Մեսիան, թեև ունեին գիտնականներ, աստվածաբաններ և հայտնի մարդիկ, որոնք կարդում էին նույն Աստվածաշունչը, որ դուք էլ եք կարդում: Մենք լիովին ընդունում ենք, որ Հիսուսն է Մեսիան ըստ այն բանի, որ մեզ ասվեց Նրա մասին, իսկ նրանք չէին կարող իմանալ և այսօր էլ չեն ընդունում: Նա մարգարեացել էր, որ նրանք կկուրանան:

57. Մարգարեություն է եղել նաև այն մասին, որ մեր ժամանակների եկեղեցին կլինի թշվառ և կույր և կմերժի երեկոյան ժամանակ տրված պատգամը (Հայտն. 3:14-20): Տեսեք, թե ինչ վիճակում է  եկեղեցին ըստ տեսիլքի՝ մերկ և կույր, և նույնիսկ չգիտի այդ մասին: Տեր Հիսուս, ողորմի’ր մեզ:  Աստվածաշունչն ասում է, որ նա մերկ էր: Նախկինում չէի տեսնում նրան այնպես, ինչպես հիմա եմ տեսնում: Լավոդիկեի եկեղեցին մերկ է, և երբ նրան տեսա անցած գիշեր տեսիլքում, նույնպես մերկ էր: